اوصف صح (احمرار العين)
=======================
تعرف انك مش هتكون بتفيد المريض وتعالجه صح لو طلعت لوكسترا أو توبرادكس لجميع الحالات؟
تعرف أن مش كل حالات احمرار العين زي بعض وأن ده عرض عام ممكن يكون في أكثر من حالة
*** ازاي ؟؟؟ ***
هم مش دول بيعالجوا جميع الحالات ويغطوا كل الأسباب واريح دماغي؟
*** تعالوا نتكلم عن احمرار العين***
أشهر حالة بتدخل لنا الصيدلية هي احمرار العين أو التهاب العين أو بمعنى أصح conjunctivitis
** أشهر أسباب احمرار العين**
* عدوى فيروسية
* عدوى بكتيرية
* احمرار بسبب الحساسية
* أسباب أخرى متنوعة
تعالوا قبل مانتكلم عن كل نوع وازاي نفرق بينهم وازاي نعالج كل نوع نقول كلام في قمة الأهمية وده أهم حاجة في حالة العيون أهم من علاج المريض
***امتى اعمل Refer***
أي واحد داخل لك عينه حمراء لازم تسأله الأسئلة دي
أتصرف بقى تحفظها تفهمها تكتبها قدامك تعلقها على الحيطة المهم كل مريض عينه حمراء تسأله الأسئلة دي
1. انت خايف من الضوء أو مش قادر تفتح عينك في الضوء؟
(May be iritis or keratitis)
2. هل حاسس أن فيه حاجة جوا عينيك علشان كده مش قادر تفتحها؟
مش إحساس الرمل أو الأكلان داخل العين ولكن قافل عينه ومش قادر يفتحها كأن فيه حاجة جواهر
(May be keratitis)
3. هل عندك مشاكل في الرؤية ومش قادر تقرأ وتشوف كويس زي الأول ؟
4. هل اتخبطت أو اتصدمت أو حاجة خبطتك في عينك؟
(May be trauma)
5. هل العين تفرز إفرازات سميكة جدا بكثرة قافلة العين طول أو أغلب اليوم؟
(May be Hyperacute bacterial conjunctivitis)
6. هل فيه صداع أو الم شديد في العين أو إحساس بالترجيع؟
(May be glucoma)
أي سؤال من الأسئلة دي كانت إجابته (ايوة)
من فضلك REFER فورا ولاتتدخل مطلقا في الحالة دي
لو جميع الأسئلة دي كانت اجابتها ( لأ )
في الحالة دي هنبدأ نتدخل ونوصف بعض الحاجات اللي ممكن تفيد المريض بعد ما نعرف إيه اللي عنده بالظبط من خلال بعض الحاجات اللي نقدر نفرق بيها
■ بعد ما اتكلمنا عن أهم الأسئلة اللي بناء عليها هتتدخل أو تعمل Refer
**** تعالوا دلوقتي****
● ● هنتكلم عن أشهر وأهم الأسباب والعلاج
● طبعا جميع الحالات هتلاقيه داخل لك بيشتكي من إحمرار في العين و إفرازات وأعراض أخرى تختلف حسب الحالة
1. العدوى البكتيرية
● هتلاقي الإفرازات الخضراء أو الصفراء اللي احنا عارفينها وبنشوفها علطول
أهم حاجة أنها:
¤ طول اليوم موجودة (مش الصباح بس)
¤ لما تمسحها بمنديل شوية وتفرز العين تاني
¤ مفيش حكة ولا دموع زيادة ولا إفرازات مخاطية
■ وزي ما اتفقنا لو الإفرازات غزيرة جدا مالية العين Hyperacute bacterial conjunctivitis أو بقالها فترة طويلة 3 أو 4 أسابيع chronic bacterial conjunctivitis علطول اعمل Refer دي مفيهاش كلام قد تؤدي إلى عمى لاقدر الله
2. العدوى الفيروسية
وأشهر سبب لها ال adeno virus وبعض الفيروسات الأخرى
¤ هتلاقي الإفرازات مخاطية الصفراء ممكن تكون مش واضحة لكن لو قربت من العين أو نزلت الجفن لتحت شوية هتشوفها ودي اللي بتميز بينها وبين الحساسية
¤ الإفرازات الخضراء أو الصفراء اللي عارفينها دي لو كانت موجودة بتكون قليلة جدا وموجودة الصباح بس مش طول اليوم
¤ فيه دموع غزيرة ومفيش حكة أو حكة خفيفة ولكنها ليست علامة مميزة Not diagnostic
¤ ممكن يكون فيه شوية ألم في العين
3. حساسية العين
¤ طبعا دي مفيش فيها إفرازات والإفرازات الخضراء أو الصفراء اللي عارفينها دي لو كانت موجودة بتكون قليلة جدا وموجودة الصباح بس مش طول اليوم
¤ دموع غزيرة جدا وحكة
¤ ممكن يقول لك كأن فيه رمل أو حاجة في العين بس فاتح عينه وماشي عادي مفيش مشكلة.
4. لبس العدسات اللاصقة
5. جفاف العين
**** العلاج ****
●● كل الحالات اللي فاتت دي بتخف لوحدها ولو مش عالجته هتأخذ وقتها وتروح ومفيش خطورة على المريض
■ أمال احنا بنعطي علاج ليه؟
1. علشان تريح العين decrease discomfort
2. تمنع انتقال العدوى من شخص لشخص
يضع أيده على عينه وبعدين يسلم على حد تاني ينقل له وهكذا.
3. تقلل فترة المرض
يبقى هنعالج كالآتي :
● هتعطي دموع صناعية علشان زي ما اتفقنا تقلل ال discomfort وتريح المريض وده في كل الحالات
1. العدوى البكتيرية
مضاد حيوي فقط ويكون بدون كورتيزون
(استخدام الكورتيزون في حالة العدوى سواء bacterial أو viral ومشاكله أكثر من نفعه فخليك في السليم وخليه بوصفة طبية)
عندك أكثر من خيار في الصيدلية زي ال tetracycline أو ال quinolones أو ال erythromycin سواء قطرة أو مرهم
هتستخدمها من 5 أيام لأسبوع 4 مرات يوميا
يفضل تخلي ال aminoglycosides زي ال gentamicin and tobramycin اختيار ثاني second choice لأن استخدامهم ممكن يزود risk of toxicity of corneal epithelium
2. العدوى الفيروسية والحساسية
● يكفي معهم جدا الدموع الصناعية أي نوع مش فارق وأي قطرة مضادة للحساسية لتخفيف الأعراض حاجة زي sodium chromoglycate أو أي antihistamine eye drops كل دي حاجات ممتازة جدا ومفيدة
● أنصح المريض يعمل كمادات باردة(مش مثلجة) على عينه هتريحه جدا جدا
3. لبس العدسات والجفاف
● يكفي معهم جدا الدموع الصناعية
● اللي يحصل لها احمرار من العدسات علطول لاتستخدم العدسة دي تاني وتغيرها.
● لاترتدي عدسة أخرى قبل من 24 ل 48 ساعة
●(ركز في دي) يفضل اللي يجيلها مع العدسات conjunctivitis وكانت بتلبس العدسات كتير تستخدم مع المرطب قطرة Quinolone antibiotic ويفضل ciprofloxacin eye drops لأن استخدام العدسات لفترات طويلة من أهم أسباب ال pseudomonal keratitis
*****
دي نظرة سريعة عن ال conjunctivitis إن شاء الله تكون مبسطة ومفيدة
بالتوفيق
لمتابعة الصفحة الرسمية على الفيس بوك
https://www.facebook.com/Dr-Moamen-Attya-1493741650946059/?fref=tsلمتابعة الصفحة الرسمية على الفيس بوك
ليست هناك تعليقات:
إرسال تعليق