ركز معايا في الكلمتين المهمين دول علشان الكلام ده تقيل حبتين
= = = = = = = = = =
●● احنا في الطب بنبدا بال mechanism ولا بنبدا بالنتيجة؟
بمعنى آخر
●●هل أنا بافترض أن ال loratadine بيقفل ال histamine receptors وبالتالي باعمل تجارب لحد ما اثبت انه مضاد للحساسية ولا باكتشف أن ال loratadine مضاد للحساسية وبعدين بدور على ال mechanism لحد ما اكتشف انه بيقفل ال histamine receptors ؟
**** ايه ياعم اللخبطة دي عاوز تقول ايه؟****
عاوز اقول لك ان الطب مبني على التجربة والملاحظة
بمعنى ان العلماء بيكتشفوا شئ أو بيلاحظوا شئ ويقعدوا يشغلوا دماغهم ويجربوا ويكتشفوا علشان يعرفوا حصل ازاي لكن مش بيفترضوا شئ ويفضلوا يلووا ويشكلوا في التجربة لحد ماتثبت نظريتهم
لذلك أغلب الطب idiopathic أو غير معروف السبب أو مش عارفين بيحصل ازاي وهكذا
**** هات مثال عملي****
كلنا درسنا في الكلية
اوعى تعطي مضاد حيوي bacteriostatic مع مضاد حيوي bactericidal احسن الاثنين هيوقفوا مفعول بعض لأن نظريا الاثنين بيشتغلوا على نفس ال receptors وبالعقل فعلا مينفعوش مع بعض
ويقوم عامل لك تجربة في المعمل تلاقيهم فعلا وقفوا بعض
تيجي تجرب على الحالات في المستشفى تلاقي احسن علاج في حالة زي
Hospitalized patients with moderate to severe pneumonia
Macrolides (bacteriostatic) + cephalosporins (bactericidal)
يقوم الواحد هازز رأسه ويقول " هي مالها ضلمت ليه كده؟"
مثال آخر (ومش عاوز حد يضربني)
نظريا ال free radicals دي حاجة ضارة وممكن تعمل لنا سرطان لذلك لما أخذ antioxidant هيقوم كانس ال free radicals ويمنع السرطان في حين التجارب أثبتت أن مضادات الأكسدة لاتمنع السرطان
تقوم أنت حادفني بطوبة في وشي علطول
وهكذا العلم غريب وجسم الإنسان عجيب ومينفعش نحكم عليه بالعقل
احنا بنشوف ايه اللي بيحصل في جسم الإنسان وندور له على تفسير مش نفسر وبعدين نخلي الجسم يعمله
*** ايه اللي خلاك تقول الكلام ده؟***
اللي خلاني اقول الكلام ده أن أحباب أفاضل كتير جدا بيتواصلوا معايا على الخاص علشان نناقش موضوع معين
وأقول له مثلا العلم والتجربة بيقولوا كذا
يقوم هو يقول لي بس بالعقل الكلام ده مينفعش انا مش قادر افهمها أو الدواء ده بيعمل كذا يبقى لازم يرفع الضغط (مثلا) اقول له يادكترة بس لما جربوه لقوا انه بيقلل يقول مينفعش لازم يزود وهكذا
تفضل في دوامة الصراع بين العقل والتجربة وال studies
في الآخر لازم ترجع لل studies مفيش قدامك حل تاني
***** هااااام جداااااا *****
** طبعا التجربة أو ال studies لها قوانين ولها ظروف وشروط
مش نجرب دواء لحاجة معينة على شخص ولا اثنين ولا 100 ولا حتى 1000 عندنا في الصيدلية ونقول اننا اكتشفنا انه بيعمل كذا واننا جربناه والعملي اهه وال feed back اهه والكلام ده
الكلام ده غلط جدا
* التجارب والأبحاث وال studies لها قواعد صارمة وشروط خاصة
**** يعني عاوزني اعمل ايه؟؟****
* اتبع الابحاث (بعد ماتعرف قواعد البحث العلمي وكيفية التفرقة بين ال studies المختلفة)
* اتبع ال guidelines اتبع ال guidelines اتبع ال guidelines
* مش كل حاجة نقيسها بعقلنا ونلوي ونضطر العملي انه يمشي ورا عقلنا بل العكس هنشوف ال studies بتقول ايه ونحاول نفهمها وندور لها على تفسير ونستخدمها في شغلنا
* الكلام ده ليس اهمالا أو تقليلا من الواقع العملي والخبرة ولكن ربط ال studies بالواقع العملي بالافتراضات النظرية له قواعد وأصول (إن شاء الله نتعلمها مع بعض واحدة واحدة )
* العلم ثروة
بالتوفيق
لمتابعة الصفحة الرسمية على الفيس بوك
ليست هناك تعليقات:
إرسال تعليق