(اوصف صح) تساقط الشعر
=========
حالات كتير جدا بتجيلنا الصيدلية بتشتكي من تساقط الشعر
وبيكون مهم جدا تحديد السبب
لأن تحديد السبب هو العامل الأساسي في العلاج
في الصورة المرفقة أغلب أسباب أو أكثر أسباب تساقط الشعر شيوعا
تعرف عليها واحفظها وتذكر الصورة
هتفرق معاك كتير
وقبل مانتكلم عن علاج التساقط تعالوا نتفق على بعض النقاط الأساسية علشان يكون الكلام واضح
1. هنا أنا بأتكلم عن تساقط الشعر العاااادي وليس الصلع الوراثي أو الثعلبة أو عدوى فطريات الرأس أو...أو...... فقط التساقط العادي أو مايسمى Telogen effluvium لكن لو هنتكلم على جميع حالات التساقط فصعب جدا تغطيتها لأن ده علم كامل ومؤسسات كاملة قائمة على علم وحالات وأنواع تساقط الشعر
2. مش هأشرح منتج بعينه أو شركة معينة ولكن هأتكلم عن الأسس والقواعد العامة اللي كل الشركات بتعتمد عليها في منتجاتها لأن كل شركة لها شغلها وطريقتها.
3. الشخص الطبيعي ممكن يحدث له تساقط لحد 100 شعرة يوميا مفيش مشكلة.
4. الواحد مش بيعرف يعد الشعر هيعرف ازاي أنه عنده تساقط؟
● هيعرف من خلال أنه لقى الشعر بدأ يقع بزيادة عن المعدل الطبيعي اللي هو متعود عليه ويلاقي الشعر بدأ يطلع في المشط وينزل في الحوض وهو بيغسل رأسه أو في الفوطة أو كتير على المخدة وهو نايم باستمرار وهكذا.
5. الشخص اللي بيحصل له تساقط من النوع ده مش بيتصلع ولابيفقد شعره نهائيا ولكن ممكن يلاقي الشعر بقى أخف من الأول
6. النوع ده غالبا بيكون له سبب من الحاجات اللي قلناها في الأسباب في البوست اللي فات ولما بتوقف السبب بيرجع التساقط لذلك رقم 1 في العلاج إيقاف السبب
*** العلاج ***
1. وقف السبب وقف السبب وقف السبب ولو السبب دواء يتم استبداله بدواء آخر مناسب للحالة بدون أن يسبب تساقط (طبعا كل حالة لها ظروفها risk benefit ratio )
2⃣العلاج اللي مكتوب في كتب العالم هو المينوكسيديل 2% للنساء و 5% للرجال لأنه الوحيد ال FDA approved .
*** المينوكسيديل ***
● محدش عارف له طريقة شغل بالظبط وفيها خلافات ولكن هو بيوقف التساقط(في معظم النظريات) عن طريق انه بيزود تدفق الدم وزيادة الأكسجين والغذاء اللي رايح للشعر.
■ مشكلة المينوكسيديل أن الشخص أول مابيوقفه في خلال 6 أشهر بيفقد كل النتائج الإيجابية اللي وصل لها والشعر بيقع تاني
3. ال FDA اعتمدت المينوكسيديل فقط ولكن ال practice أوسع من كلام ال FDA بكتير جدا.
4. شركات كتير جدا عملت مركبات في منتجات المسماة Medicated cosmetics بتقوم بنفس الحاجات اللي بيعملها المينوكسيديل أو قريب منه بل أن بعضها لايعود تساقط الشعر مرة أخرى بعد إيقافها.
5. مشكلة الشركات دي أن المنتجات اللي عملتها لم تعتمد من FDA كعلاج كما أن الدراسات اللي عملتها بتكون على عدد قليل جدا أغلبها من 100 ل 200 فرد.
6. الشركات دي بعضها ممتاز والمنتجات بتاعته فعلا فعالة والواقع بيقول كده ومحدش يقدر ينكر الكلام ده وبعضها فعلا مش كويس وكله إدعاءات ومش بيجيب فائدة.
7. الحكم في موضوع الشركات دي هو خبرتك انت مع العميل وتقرأ عن طريقة عمل المنتج كويس وجربه مع أكثر من عميل وشوف ال feed back
وحقيقة عن خبرة: الشركة اللي مش كويسة ومنتجها مش فعال بتسقط لامحالة ومنتجها مش بيطول في السوق
8. الكبسولات اللي بالفم زي اللي بتحتوي على زنك وسيستين وكل الفيتامينات والمكملات المفيدة للشعر دي مفيدة جدا بجانب المنتجات الموضعية وبتقوي مفعولها جدا وينطبق عليها نفس الكلام على ال Medicated cosmetics من ناحية قلة الدراسات وعدم الاعتماد من ال FDA و الخبرة مع العملاء
أتمنى يكون الموضوع مفيد
بالتوفيق
لمتابعة الصفحة الرسمية على الفيس بوك
بالتوفيق يا دكتره
ردحذفجزاكم الله خيرا دكتورنا الغالي
حذفبالتوفيق يا دكتره
ردحذفمجهود محترم ارفع له القبعة
ردحذفربنا يحفظك ويبارك في عمرك
حذفربنا يحفظك ويبارك في عمرك
حذف