مش كل كلام المريض غلط

مش كل كلام المريض غلط

أوقات كتير كان المريض يدخل لي الصيدلية ويقول معلومات او يطلب طلبات بالنسبة لي هي مجرد خزعبلات وخرافات او وصفات ملهاش قيمة الناس بتوصفها لبعض
بعض الكلمات الناس بتقولها بطبيعتها أو بالفطرة وهم نفسهم مش عارفين معناها

وكنت دايما اقول في ذهني ايه الجهل ده، ارحمنا يارب،.....وغيرها من الكلام

لكن كل ما الإنسان بيتعلم بيكتشف قد ايه هو كان جاهل ومحتاج يتعلم اكتر
وتكتشف ان كلام كتير من اللي الناس بتقوله مش غلط بنسبةً 1000% وفِي احيان كتير فيه جزء صح فقط محتاج يكون عندك المعلومة الصحيحة الكاملة علشان تؤكد للمريض كلامه بطريقة علمية او تأخذ الجزء الصح من كلامه وتبني عليه

*** مثال👇🏻👇🏻***
• زمان كان اي حد يدخل يقول لي : لو سمحت يادكتور عاوز ستربسلز (للكحة)😳
فأنا طبعا افتح بقي 😮 وأقوله ياعم الحج الستربسلز ده للحلق مش للكحة خالص
ازاي يادكتور بيقولوا مفيد للكحة
وانا منشف دماغي، ياحج الله يكرمك بلاش الخزعبلات دي
بعد كده لما اتعلمت لقيت ان ال demulcentss اللي منها أقراص الاستحلاب دي كلها بتفيد في تلطيف الحلق من ال irritation اللي بيحصل من الكحة وبالتالي بتهدي جزء من الكحة

• ساعات تلاقي حد يقولك انا بدهن فكس Vicks vaporub للصدر يهديلي الكحة 😳
كنت اول ما اسمع كده 😮 ياحج فكس ده للعضلات ايه علاقته بالكحة بطلوا جهل بقى(بيني وبين نفسي)
بعدها لما اتعلمت اكتشفت ان
Camphor and menthol are FDA approved as topical antitussive
ساعتها تبقى عاوز تشوف الراجل ده تاني وتقول له معلش انا اللي مكنتش عارف حاجة
 وهكذا

***الهدف من الكلام 👌🏻✔️***
• مش معنى ان المعلومة مش عندك انها مش موجودة
• مش كل كلام اللي بيطلب منك حاجة في الصيدلية غلط
• احترم اي كلمة لأي عميل عندك في الصيدلية مهما كان كلامه من وجهة نظرك مش صحيح
 • ابحث دايما عن اي كلام يتقال قدامك وشوف مدى صحته، وشوف الجزء الصح فيه والجزء الغلط، واعرف اصله جاي منين
 • مش معنى كلامي ان اي حد يطلب منك غلط تنفذه لانه ممكن يكون صح وانت مش عارفه، ولكن لو مش عارف وجهه للصح اللي انت متأكد منه بنسبة 100% لحد ماتتأكد من اي معلومة انت مش عارفها