الحلقة الاولى من التدريب والعرض(استراحة الخميس)
الأول لازم نكون عارفين إن التدريب عامة أو تدريب العاملين هو ال back bone بتاع أي شركة وده هنعرفه كويس قوي بس من خلال اننا نعرف يعني ايه كلمة التدريب بس
شوف ياحبيبنا
● التدريب : هو الجهد المنظم و المخطط له لتزويد القوى البشرية بمعارف معينة ، و تحسين و تطوير مهاراتها و قدراتها ، و تغيير سلوكها و اتجاهاتها بشكل إيجابي بناء.
*** ايه ياعم الكلام ده ***
يعني انا كفرد أو كشركة لما بعمل معاك مجهود منظم علشان أوصل معاك أو اطلع منك بنتيجة تهدف لمصلحة العمل وتحقق أهداف الشركة.
الجهد المنظم ده اللي انا بعمله من خلال 3 حاجات أساسية علشان أحقق أهداف المؤسسة زي ماقلنا:
1. تغيير قناعات وبناء اتجاهات
2. توصيل معارف
3. بناء وتطوير مهارات
*** اشرح لنا عملي ***
●● انا دلوقتي شركة أدوية عاوز اطور مبيعات شركتي بنسبة.....%
بأبدأ اشتغل على كذا حاجة من ضمنها الموارد البشرية أو الأشخاص العاملين نفسهم
● أجيب المنتجات اللي المفروض نعمل منها النمو المطلوب وأدرب العاملين عليها من خلال ال 3 حاجات اللي اتكلمنا عليها
1. اغير قناعاتهم عن الشركة وعن المنتج ولو عندهم أي مشكلة من الناحية دي ابدا اوضحها بحيث يكون عندهم قناعة تامة بالشركة والمنتج والتوجه اللي احنا كلنا كمنظمة بنتجه له ودي أهم نقطة في التدريب.
2. ابدأ أعرفهم معلومات تامة وكاملة عن المنتج وتوضيح الأبحاث عنها والرد على جميع الاستفسارات القائمة وحتى المحتملة بحيث يبقى عندهم معلومة تامة ومعرفة كاملة بالمنتج بحيث ممكن يكون أحد أعضاء الفريق مقتنع تماما بكل شئ ومفيش مشكلة وعنده مهارات ممتازة يقدر يسوق بيها المنتج ويعرضه كويس ويقنع اللي قدامه بيه لكن للأسف مفيش عنده أي معلومات أو معلومات ضعيفة عن المنتج يبدأ يقع من أول سؤال أو اثنين
3. ابدأ ابني واطور المهارات المطلوبة لاستخدام هذه المعلومات
ممكن يكون حد عنده معلومات كتير لكن مش عارف يسوقها أو مش عارف يستغلها أو مش عارف يعرضها يبدأ التدريب على النقطة دي نقطة تطوير مهارات عرض واستغلال المعلومة
يبقى انا دلوقتي عملت ايه؟
غيرت قناعات، أعطيت معارف، طورت مهارات
*** مثال آخر ****
انا كصيدلي واقف في الصيدلية وحبيت أدرب زميل جديد
مش بس المفروض اخليه يمر على الرفوف ويحفظ الأصناف وخلصنا
المفروض تغير قناعاته عن المجتمع والشركة والمنتجات وتعطيه المعلومات والمعارف السليمة الكاملة وتبدأ تعلمه مهارات التعامل والعرض واستخدام المعلومة
*** مثال ثالث ***
انا مندوب بأدرب مندوب جديد ونازل معايا الزيارات مش بس بعلمه يتكلم ازاي مع الدكتور ولا الصيدلي
ولكن اغير قناعاته عن الأطباء والصيادلة والمنتج والشركة واعرفه معلومات كاملة جدا عن المنتج بتاعه وادربه على مهارات استخدامها وازاي يعرضها ويحقق بيها التارجت
** وهكذا أمثلة كتير ✍ **
كلها تتلخص في ال 3 حاجات اللي ذكرناهم
*** ايه الفائدة من الكلام ده ؟***
1. ابقى عارف لما أدرب شخص أدربه على ايه وانا لما اتدرب على أي حاجة أكون عارف المطلوب مني اعرف ايه علشان أحقق المطلوب.
2. انا كمدير لما اوزع متدرب على حد يدربه أخليه يتدرب مع واحد عنده ال 3 أشياء علشان يدربه صح.
3. انا لما اعمل تحليل واشوف نقاط الضعف في الموارد البشرية فين اشوف نقطة الخلل بالظبط واحلها
وهكذا.....
** الخلاصة **
التدريب مش مجرد إلقاء معلومات ده اسمه تدريس
التدريب إعطاء معارف وتغيير قناعات وبناء وتطوير مهارات كلها تهدف في النهاية لتحقيق هدف المؤسسة
بالتوفيق
لمتابعة الصفحة الرسمية على الفيس بوك
ليست هناك تعليقات:
إرسال تعليق