الحلقة الثانية من التدريب والعرض (استراحة الخميس)
●●●●●●●●●●●●●●●●●●●●
نكمل مع بعض كلامنا عن التدريب والعرض ونقول النهاردة قاعدة مهمة جدا حطها حلقة في ودنك
(التدريب ليس مهنة)
**** ازاي طيب؟****
●●شوف ياسيدي
التدريب عبارة عن نقل للخبرات (وركز معايا على كلمة نقل الخبرات)
● يعني انا دلوقتي صيدلي شغال في صيدلية بقالي 10 سنوات بالتالي بقى عندي خبرات كتير جدا
ساعتها ممكن أدرب أي واحد يشتغل معايا وانقل له خبراتي لكن مثلا مينفعش واحد لسه في الكلية أو خريج من كم شهر وبعدين يقول أنا هأدرب
طيب ايه الخبرات اللي هينقلها؟ اكيد لسه مفيش خبرات
● انا دلوقتي مندوب بقالي 5 سنين فأصبح عندي خبرة كبيرة اقدر انقلها للمندوب اللي جاي يتدرب معايا....لكن لو انا لسه مندوب مفيش عندي خبرة هأنقل له ايه؟
● انا مدير شركة بقالي 6 سنوات مثلا ساعتها ممكن ادرب ناس على الإدارة لأن عندي خبرة لكن لو انا لسه مدير من فترة بسيطة ومفيش مواقف مرت عليا..إيه الخبرة اللي هأنقلها؟
وهكذا
*** أهم حاجة ***
● نقل الخبرات ده لازم يكون مدعوم بخلفية علمية ونقل الخبرة بتاعتي على أساس علمي بحيث انقل للمتدرب الصح والخطأ
لكن لو عندي خبرة كبيرة لكن كلها خبرة غلط أو بعمل فيها ممارسات غلط يبقى انا هانقل للمتدرب الغلط والخبرات الخاطئة
● دلوقتي انا صيدلي في الصيدلية وكل دور برد ولا شوية رشح عند أي واحد داخل لي أقوم مطلع له مضاد حيوي وبقالي 10 سنوات على كده وهي دي خبرتي أقوم ناقل الخبرة دي لواحد بيتدرب معايا؟
في الحالة دي لأن مفيش أساس علمي يبقى انا بانقل خبرة غلط بدون أساس علمي
● دلوقتي انا مندوب وبقول اي معلومات غلط عن المنتج للأطباء والصيادلة أو بأمارس اي حاجة non ethical أهم حاجة أحقق التارجت وبقالي 5 سنوات على كده وجاء مندوب تاني يتدرب معايا هادربه على المعلومات الصح ازاي وهأقول له يمارس ال ethics ازاي وانا مش بامارسها ولا عندي خبرة فيها ولا عندي دليل علمي على اللي انا بعمله
يبقى اكيد بنقل خبرة غلط على أساس غير علمي.
● دلوقتي انا مدير بقالي 6 سنين شادد على اللي معايا وعامل عليهم stress وخلاص ومفيش أي motivation للفريق بتاعي وماشي بسياسة الكرباج وبس ومبدئي أن ال motivation ده ملوش أي لازمة
هأدرب مديرين جداد على غلط وخبرة غلط مفيش عليها أي أساس علمي
وهكذا
*** اربط مع الحلقة اللي فاتت ***
قلنا في الحلقة اللي فاتت أن
●التدريب تغيير قناعات وبناء اتجاهات وتوصيل معارف وبناء وتطوير مهارات.
والمرة دي قلنا
● التدريب ليس مهنة وهو عبارة عن نقل الخبرات على أساس علمي.
●● جمع الكلام بقى
التدريب نقل خبرات من أشخاص عندهم خبرة مبنية على أساس علمي واستغلال هذه الخبرات في تغيير القناعات والاتجاهات وتوصيل المعارف وبناء وتطوير المهارات.
*** بناء على اللي قلناه ***
مش شرط تكون في قسم التدريب علشان تكون مدرب
ولكن انت في صيدليتك ممكن تكون مدرب وفي شغلك مدرب ومع أبنائك مدرب وفي تعاملك مع اللي حواليك مدرب وهكذا
انتظرونا الحلقة القادمة
لينك الحلقة اللي فاتت
بالتوفيق
لمتابعة الصفحة الرسمية على الفيس بوك
ليست هناك تعليقات:
إرسال تعليق