الفرق بين أنواع الأنسولين

(اوصف صح) الأنسولين وأكل البيت

○●○●○●○●○●○●○●

كل واحد فينا له نظام في الأكل  في بيته كل يوم وكل واحد له طريقته الخاصة فهتلاقي عندك عدة أنواع من الناس:

1. واحد كل مايجوع يأكل أكل خفيف بس سريع جدا يقضي احتياجات جسمه بسرعة لمدة كم ساعة وخلاص وبعد 4 ولا 6 ساعات تلاقيه بيقرقض تاني وهكذا على حسب مايحس بالجوع ويحس أن جسمه محتاج زي كده واحد تلاقيه بيأكل طول النهار كورواسون ولا سندوتشات مربى خفيفة المهم تقوم جسمه بسرعة جدا.

2. واحد بيأكل 3 وجبات خفيفة بس تمشيه اكتر شوية من الأول على مدار اليوم حسب احتياج الجسم المهم يكون مفعولها سريع وتلاقيه بعد نص ساعة من الأكل بدأ يحس بالطاقة من جديد زي مثلا واحد أكل سندوتشين ولا ثلاثة جبنة رومي ولا لانشون.

3. واحد بيأكل وجبتين في اليوم بس يقوم خابط في الإفطار فول على فلافل على مسقعة تفضل نفسه مسدودة طول النهار لحد بالليل يقوم ضارب النص فرخة تخليه زي الوحش لتاني يوم بس مشكلة الأكل ده انه تقيل وبيأخذ حوالي ساعة ولا اثنين لحد مايبدأ يتهضم لذلك ممكن يأكل قبله حاجة خفيفة كده تقومه سريعا لحد الديناميت اللي اكلته ده مايبدأ يتحرك وممكن يحتاج يقرقض كده في وسط اليوم حاجة سريعة.

4. واحد بيعمل زي رقم 3 بس بيقوم واخد كله مع بعضه على صينية واحدة فيها الكورواسون والمربى السريعة مع الديناميت الفول والفلافل وفي وجبة الليل نفس الشئ تقوم تلاقيه طول اليوم تمام التمام

○● وناس كتير بتفضل الطريقة دي بحيث من أول ماتأكل تحس بنشاط وفي نفس الوقت تفضل بطنك مليانة طول حوالي نص اليوم لحد الوجبة التانية.  

5. واحد بقى يقوم خابط لك وجبة واحدة في اليوم بس تقومه لحد تاني يوم كبسة ولا فرخة ولا شوية كباب تخليه 24 ساعة حاسس بالشبع وبطنه نص مليانة لكنه ممكن أثناء اليوم يحتاج قرقضة خفيفة كده علشان لو بذل مجهود ولا حاجة لكن ميقدرش يضرب حاجة دسمة تاني وبرضه القنبلة اللي أكلها في أول اليوم دي بتأخذ لها برضه ساعة ولا اثنين لحد ماتتهضم وتشتغل.

وأغلب الناس بدأت تتجه للطريقة دي دلوقتي لأنها أفضل طريقة بتخلي الواحد حاسس بنصف شبع طول اليوم.

○●اللي حضرتك قرأته فوق ده مثال تقريبي لأنظمة الأنسولين المختلفة (الوجبات ) لضبط السكر في الجسم على مدار اليوم.

♢أنواع الأنسولين:

وقبل مانتكلم عن أنواع الأنسولين أهم نقطة تحفظها بيشتغل بعد قد ايه Onset وبيقعد مفعوله قد إيه Duration علشان تعرف هيؤخذ ازاي  

1. ال Rapid Acting زي رقم 1 فوق (الكورواسون والمربى)

ربنا سبحانه وتعالى جعل جسمنا غني وجاهز في أي وقت يطلع انسولين لأي احتياج للجسم في أي وقت

وأقرب شئ ليه هو ال Rapid Acting اللي هو النوفورابيد Aspart والهيومالوج Lispro والأبيدرا Glulisine

● وده طبعا علشان نعتمد عليه لوحده كعلاج الشخص ممكن يأخذ حوالي 4 مرات إبر أو أكثر يوميا على حسب الاحتياج. 

● النوع ده بيشتغل سريع جدا بعد حوالي 15 دقيقة ويستمر مفعوله من 4 ل 6 ساعات ( زي رقم 1 يقرقض على حسب الحاجة لكن مش وجبة قوية لوقت طويل)

● لذلك هذا النوع يؤخذ قبل الوجبة بربع ساعة أو يؤخذ في الوريد لعلاج غيبوبة ارتفاع السكر لأنه زي ماقلنا سريع المفعول جدا

● ده اللي بيسموه الصافي 

2. ال Regular زي رقم 2 فوق(سندوتش الجبنة الرومي)

زي ال Humulin R وال Actrapid

● وده نوع سريع وبيشتغل بعد نص ساعة ويستمر المفعول حوالي 8 ساعات

● لذلك يؤخذ قبل الوجبة بنص ساعة

● وده النوع اللي ممكن يتخلط مع طويل المفعول بحيث يعطي مفعول سريع.

● ده برضه بيقولوا عليه الصافي.

3. ال Intermediate acting ( اكلة الفول والفلافل)

زي الهيومولين N وال insulatard 

● وده بيأخذ حوالي ساعة أو ساعتين لحد مايبدأ مفعوله ويستمر المفعول حوالي 12 ساعة

● لذلك النوع ده في الغالب بيحتاج معاه Regular أو ال Rapid علشان يعطي مفعول سريع لحد ماهو يبدأ يظهر مفعوله.

● وده عكر لذلك ممكن يقول لك عاوز الأنسولين العكر

4. المخلوط زي رقم 4 (الصينية المجمعة)

● وده هتلاقيه مخلوط intermediate مع Regular أو Rapid زي ماقلنا علشان ال Regular أو ال Rapid يعطي مفعول سريع بعد الوجبة وال intermediate يعطي مفعول طويل نوعا ما 

● المخلوط هتلاقيه يؤخذ مرتين يوميا قبل الوجبة من ربع لنصف ساعة زي ماقلنا على حسب نوع المخلوط وهتلاقي نسب الخلطة مختلفة من نوع للتاني وكل حالة الدكتور بيتابع معاها ويكتب لها أنسب خليط لسكرها.

● مخلوط intermediate مع Regular زي الميكستارد 70/30

لذلك يؤخذ قبل الوجبة بنصف ساعة مفيش مشكلة مرتين يوميا.

● مخلوط intermediate مع Rapid 

70/30 زي النوفوميكس 

75/25 زي الهيومالوج 25

50/50 زي الهيومالوج 50 

لذلك يؤخذ قبل الوجبة بربع ساعة مفيش مشكلة مرتين يوميا.

● وده برضه عكر لذلك ممكن يقول لك هات الأنسولين العكر.

5.الطويل المفعول زي رقم 5 (وجبة الكبسة والكباب)

وده زي اللانتوس Glargine والليفيمير Detemir

● وده بيأخذ حوالي ساعة ونص أو ساعتين لحد مايبدأ مفعوله لكنه بيستمر لحد 24 ساعة.
● النوع ده يؤخذ مرة واحدة يوميا بغض النظر عن موعد الوجبة.

● ده أحدث النظم في العالم حاليا لاستخدام الأنسولين وده عن طريق أن الشخص بيأخذ نصف احتياجه اليومي من الأنسولين وبكده يفضل السكر طول اليوم نوعا ما معقول ومش يحصل ارتفاع مفاجئ والنصف الثاني من احتياجه يأخذه في صورة Regular أو Rapid قبل كل وجبة على حسب كل وجبة.

لذلك دايما هتلاقي اللي بيشترى منك لانتوس هتلاقيه بيشترى معاه نوفورابيد أو ابيدرا أو هيومالوج أو هيومولين آر أو اكترابيد

● أهم مايميز النظام ده قلة تذبذب واضطراب السكر أثناء اليوم 

●○ دي كانت نظرة عامة وسريعة عن الأنسولين أتمنى تكون مفيدة وثبتت المعلومة معانا

لمتابعة الصفحة الرسمية على الفيس بوك

https://www.facebook.com/Dr-Moamen-Attya-1493741650946059/?fref=ts

بالتوفيق