(اوصف صح) صيام رمضان كامل
●○●○●○●○
رمضان كريم ربنا يتقبل منا ومنكم الصيام والقيام وصالح الأعمال
🔴 بداية كده الكلام ده موجه للصيادلة والأطباء فقط لاغير ومفيش أي حد غير كده يستخدم الأدوية دي بدون الرجوع للصيدلي أو الطبيب لأن كل دواء له تفاصيل كتييير غير اللي في البوست.
سؤال كل سنة
🔵 دكتوووور عاوزة اصوم رمضان كله اعمل إيه ؟؟
طيب تعالوا نشوف هنعمل ايه سريعا بدون مانستغرق في تفاصيل طويلة
🔵 عندنا أكثر من نقطة لازم نأخذهم في الإعتبار:
1. الجرعات في رمضان بتحتاج تتظبط شوية عن الأيام العادية.
2. نهار رمضان السنة دي طويل جدا بيوصل ل 15 ساعة ودي نقطة مهمة في الفرق بين الجرعة والثانية.
3. لازم قبل ماتطلع أي حبوب تستبعد وجود حمل لأن ممكن يكون في أوله والمرأة لاتعلم.
4. لازم المرأة تعلم أن بعد الكورس ده ممكن دورتها تتلخبط أو تتغير مواعيدها عن المواعيد اللي هي متعودة عليها.
● ادخل في الموضوع
قدامك 3 خيارات ممكن تعملهم
1. ال norethisterone البريمولوت ان
2. ال dydrogesterone الدوفاستون
3. حبوب منع الحمل المركبة
تعالوا نناقش كل واحد بسرعة
1. ال norethisterone البريمولوت ان وده أشهر خيار اللي كلنا عارفينة
● ده حبوب progesterone derivative زي ماحنا عارفين.
● جرعتها حبة (5 ملجم) 3 مرات يوميا ممكن تؤخذ لحد 3 أو 4 أسابيع مفيش مشكلة (مكتوب داخل العلبة من 10 ل 14 يوم)
● لازم تؤخذ قبل الدورة من 3 ل 5 أيام.
طيب هنعمل ايه في رمضان ؟؟ وكمان 15 ساعة صيام؟
1. إما تأخذ حبتين بعد الإفطار وحبتين بعد السحور ( ال safety عالية لاتقلق) لكن حبة مرتين يوميا خاصة في وقت الصيام الطويل ده مش كل النساء ممكن تظبط معاها.
2. أو تنتقل لأحد الخيارات التالية
🔴 لازم تتأكد أن مفيش حمل
Teratogenic category X
🔴 خد بالك لو فيه حمل مش هينزله بس هيشوهه لذلك مهم جدا جدا جدا استبعاد الحمل.
2. ال dydrogesterone الدوفاستون
● ده حبوب progesterone derivative زي ماحنا عارفين.
● جرعتها حبة (10 ملجم) مرتين يوميا ممكن تؤخذ لحد 3 أو 4 أسابيع مفيش مشكلة.
🔵 أهم مايميزه أن جرعته مرتين في اليوم فهيكون مناسب لشهر رمضان.
🔵 أمان في الحمل لذلك لو المرأة حامل وهي مش عارفة متقلقش منه بل إنه هيثبت الحمل.
● لازم يؤخذ قبل موعد الدورة ب 5 أيام.
3. حبوب منع الحمل المركبة
● ودي زي ماحنا عارفين Combination من استروجين وبروجستيرون.
● ودي أفضل خيار للمرأة اللي بتأخذ حبوب منع الحمل.
● ببساطة المرأة لما تخلص العلبة تبدأ علطول في العلبة اللي بعدها لحد نهاية رمضان وبعدين توقف.
●○● دي كانت الخيارات○●○
1. خد بالك كل الخيارات دي اول ما المرأة توقف الحبوب بعدها من 3 ل 5 أيام هتنزل عليها الدورة.
2. بعد الكورس ده الدورة ممكن تنزل أكثر غزارة وأشد ألما من اللي المرأة معتادة عليه
● بكده نكون قلنا نبذة مختصرة عن موضوع إيقاف الدورة في رمضان أتمنى يكون مفيد
لمتابعة الصفحة الرسمية على الفيس بوك
ليست هناك تعليقات:
إرسال تعليق