الحلقة الثالثة من التدريب والعرض (استراحة الخميس)
نكمل مع بعض سلسلة التدريب والعرض
قبل ماندخل في موضوع النهاردة تعالوا نوضح نقطة
انت عامل لنا إزعاج بالتدريب وفايدته ونعمله ازاي و.....و......
ياعم افهمني انا مش مدرب
●●في الحالة دي نقول لك ببساطة:
1. لو تابعت الحلقتين اللي فاتوا هتلاقيك دائما حتى في حياتك اليومية والعملية إما مدرب أو متدرب إن صح التعبير
2. زي ماقلنا قبل كده كل ما يكون عندك أساسيات(أساسيات فقط) العلوم المختلفة هتتضح لك حاجات كتيييير كانت غايبة عنك.
3. كل واحد فينا لازم يييجي عليه وقت ويتدرب على حاجة معينة ولو مكنتش كده اعرف علطول انك في خطر لأن ده معناه انك لاتواكب العصر ولا تطور من ذاتك ولامستواك الوظيفي وده معناه انك في النازل
وبم انك لازم علشان تتطور تكون بتتدرب على حاجات جديدة يبقى لازم تكون فاهم اللي قدامك بيفكر ازاي وعاوز منك ايه علشان توصل للي هو عاوزه وبكده تقدر توصل لأكبر استفادة ممكنة وتقارب لوجهات النظر
*** نكمل بقى كلامنا ***
●○النهاردة هنتكلم عن أهم نقطة في التدريب وهي (الاحتياج التدريبي Training Needs)
♡ يعني ايه الكلام ده؟
ببساطة جدااااا
● انت كمتدرب أو الشخص اللي انت بتدربه فين؟ وعاوز توصل بيه فين؟
بمعني آخر
● هو مستواه قد ايه دلوقتي وعاوز توصل بمستواه لفين؟
**** وفي الحالة دي****
لما بتعرف هو فين وعاوز توصل بيه فين علطووووول بتحدد ال Gap أو الفجوة التدريبية أو نقاط الضعف عند المتدرب أو عند مجموعة المتدربين اللي محتاج/محتاجين يتطوروا فيها وأبدأ ادربهم عليها
● طبعا عندنا طرق علمية ومنهجية لتحديد الفجوة دي وعمل مايسمى بال Training need analysis TNS وده ممكن نتكلم عليه بعدين بس خلينا نركز دلوقتي يعني ايه الفجوة التدريبية
** كلمني كلام عملي وتطبيق**
زي ماقلنا في المرات اللي فاتت التدريب عامة بيهدف لتغيير القناعات وتطوير المعارف والعلوم والمهارات
● انا دلوقتي صيدلي في الصيدلية جاي معايا زميل علشان ادربه
هل اقول له يلا بقى انتشر في الصيدلية مش عاوز رف إلا لما تحفظه؟
ولا أعرفه ايه بالظبط؟
●●الصح اعرف الشخص ده انا محتاج أعلمه ايه بالظبط واوصل بمستواه لفين وهو مستواه ايه دلوقتي من الحاجات اللي المفروض يعرفها وأبدأ اشتغل معاه (حاجة كده زي تحديد المستوى في كورسات الانجليزي)
مثال :
زميلي ده كان شغال في السعودية قبل كده كذا سنة وعارف طبيعة الناس كويس وعارف الأصناف اللي عندنا في المتوفرة في السوق السعودي كويس يبقى الشخص ده مش محتاج يعرف الأصناف لكن فقط محتاج يعرف الجديد اللي مش شافه قبل كده وأبدأ أركز معاه في التدريب على نظام الشركة وبرنامج المبيعات ولو عنده خلل في بعض المهارات ادربه عليها لحد مايوصل للمستوى المطلوب منه واللي يتماشى مع المستوى اللي أي صيدلي عندي في الشركة لازم يكون فيه في جميع الجوانب.
بخلاف لو زميل لسه جاي من مصر جديد ده لازم الأول يتدرب ويتعرف على طبيعة المجتمع والأدوية السعودية قبل أي شئ.
● لو بيتدرب معايا صيدلي مستواه العلمي ممتاز مش محتاج اضيع وقت في تطوير مستواه العلمي ولكن أركز معاه في جانب المهارات Skills لو كان عنده فيها بعض القصور والعكس صحيح
● انا دلوقتي مندوب في شركة وجاي زميل جديد يتدرب معايا
• لازم الأول أحدد هو فين ومستواه ايه وعاوز أوصل بيه لفين
مثلا مندوب جديد لسه متخرج من الكلية وأول مرة يشتغل مندوب
لازم يعرف الأول يعني ايه مندوب وايه هي الوظيفة دي وأبدأ معاه واحدة واحدة لحد مايوصل للمستوى المطلوب منه كمندوب عامة والمطلوب منه كمندوب في شركتي بم يتماشى مع سياسة شركتي خاصة.
بخلاف لو جالي مندوب خبرة من شركة تانية وجاي شركتنا جديد في الحالة دي مش محتاج أعرفه أساسيات المهنة بقدر ماهو محتاج يعرف نظام شركتنا وال Product اللي هو شغال عليه وال Selling points بتاعته ولو عنده بعض القصور في جانب المهارات ابدأ أطوره معاه.
● دلوقتي انا مدير في شركة وجاي مدير جديد يتدرب معي
• لازم الأول أحدد هو فين ومستواه ايه وعاوز أوصل بيه لفين
● مثلا لسه واحد مترقي من موظف عادي أو مندوب أو صيدلي وأصبح مدير
ده لازم ابدأ معاه من الصفر واعلمه وادربه على الإدارة مهما كان قارئ لأن العملي والواقع له حكمه غير القراءة النظري
بخلاف لو جالي مدير من شركة تانية وخبرة في الإدارة وجاي يشتغل عندي في الشركة أو مدير اترقى من مستوى إداري لمستوى إداري أعلى
ده راجل عنده خبرة وفاهم يعني إيه إدارة وشغلها ساعتها مش محتاج يعرف أساسيات إدارة ولكن محتاج يعرف نظام الشركة أو مهام الوظيفة الجديدة وازاي يتعامل على مستوى اداري أعلى ويتدرب عليها
وهكذا
*** خلاصة اليوم ***
انك قبل ماتكون متدرب أو تكون مدرب وتبدأ تدرب حد
لازم تحدد الفجوة Gap وتشوف انت فين وعاوز توصل لفين أو المتدرب اللي معاك فين ولازم يوصل لفين بم يهدف لتحقيق المستوى الوظيفي المطلوب لتحقيق استراتيجية الشركة أو المنظومة
غير كده ممكن تبذل وقت ومجهود في حاجات اللي قدامك مش محتاجها وتقع وتنسى أساسيات هو محتاجها ممكن تؤثر على سير العمل بعد كده
بالتوفيق
لينك الحلقة اللي فاتت
لمتابعة الصفحة الرسمية على الفيس بوك
ليست هناك تعليقات:
إرسال تعليق