¤ لو سمحت يادكتور ايه احسن غسول نسائي؟ أنا بحب استخدمه كنظافة شخصية يوميا
●● السؤال ده بنتسأله كتير في الصيدلية أو العميل بيروح يقف قدام الغسولات الكتير ويحتار ويبقى مش عارف يختار
إيه وبناء على أي أساس
**تعالوا نعطي خطوط عريضة**
○ عن أهم النصائح المفيدة للنظافة الشخصية لأي امرأة
○ القواعد العامة لاختيار اي غسول وبعدها هنعرف نفرق بين الأنواع
●● معلومات هامة مبدئيا●●
● المهبل عند المرأة في الطبيعي بيكون وسط حامضي ال PH بتاعته من 3.5 ل 4.5
● الوسط الحامضي ده بيئة مناسبة جدا لنمو البكتريا الطبيعية bacterial flora في المنطقة الحميمة عند المرأة وظيفتها الدفاع الطبيعي عن المنطقة دي وأي تغير في ال PH دي بيأثر على البكتريا الطبيعية ويجعل الميكروبات الضارة pathogenic تتغلب على الوسط وتسبب العدوى
● لازم نكون عارفين إن الافرازات اليومية دي حاجة طبيعية جدا عند المرأة وصحية كمان نتيجة وجود هرمون الاستروجين لذلك المرأة لما بتوصل سن توقف الدورة الشهرية بيبدأ يحصل عندها جفاف في المهبل نتيجة قلة الاستروجين.
● المرأة ممكن أن تفرز يوميا من 2 ل 5 سم من الافرازات الطبيعية وبتكون بيضاء أو شفافة مخاطية سميكة نوعا ما عديمة الرائحة في الغالب فلما تلاقي كده طمنها أن ده شئ طبيعي مفيش منه مشكلة.
● التدخل بيكون في حالة تغير الإفرازات عن خواصها الطبيعية وتبدأ تظهر معاها أعراض زي اللي اتكلمنا عنها في أشهر الالتهابات النسائية (اضغط الرابط)
*** ايه الأسباب؟؟؟***
إيه الأسباب اللي بتعمل عند المرأة خلل في ال PH وبالتالي تتأثر البكتريا النافعة وتنمو الميكروبات الضارة وبالتالي تظهر الالتهابات والافرازات الغير طبيعية؟
1. بعض أنواع مسحوق الغسيل المستخدم لغسيل الملابس.
2. الملابس الداخلية الضيقة جدا والمصنوعة من غير القطن لذلك لابد من النصح بالملابس الداخلية أن تكون قطن 100% وتجنب الضيقة جدا خاصة وقت النوم
3. استخدام الدش المهبلي من أقوي أسباب القضاء على البكتريا النافعة وكل التوصيات العالمية حاليا بتمنع استخدامه
4. الدورة الشهرية
5. بعد العلاقة الحميمية sexual intercourse ودي بيكون التغير فيها مؤقت وبيرجع المكان لطبيعته علطول
6. تنظيف المنطقة الحميمة يوميا بصابون أو غسول منظف يومي به صابون أو عطور
☆لذلك الغسول لازم يكون خالي من العطور والصابون وأن يكون ال PH بتاعته مثل ال PH الطبيعية للمنطقة الحميمة وان يكون خالي من أي مواد قاتلة للبكتريا
7. منتجات إزالة الشعر زي الكريم والرغوة والحاجات دي
☆ لذلك أفضل شئ تنصح العميل باستخدام الأدوات الآخرى زي ماكينات إزالة الشعر وأجهزة الليزر ممتازة جدا .
8. أي حاجة ممكن تعمل تهيج أو تحسس للمنطقة دي.
9. عوامل تانية كتير بس اللي فات الأشهر
*** بعد الكلام الكتير ده ***
نختار الغسول على أي أساس؟
هتلاقي الغسول اللي عندك في الصيدلية اما يحتوي على
1. أيودين povidone iodine وده يستخدم في حالة العدوي البكتيرية والفطرية لفترة محدودة ولايستخدم يوميا في حال عدم وجود عدوى
☆☆لايستخدم في الحمل
2. مضاد بكتيريا chlorhexidine وده يستخدم في حال العدوى البكتيرية والبكتريا اللاهوائية
● له مفعول نوعا مضاد للفطريات ولكن أضعف من ال povidone iodine لذلك ممكن تستخدمه في حال العدوى الفطرية عند منع استخدام ال iodine زي حالات الحمل لأنه آمن جدا في الحمل ☆☆
● الغسولات العادية ممكن تستخدم كغسول يومي بالشروط اللي قلنا عليها فوق
●تكون خالي من العطور والصابون
● تكون ال PH بتاعته مثل ال PH الطبيعية للمنطقة الحميمة
● تكون خالية من أي مواد قاتلة للبكتريا
☆☆ بده نكون أعطينا خطوط عريضة وعامة عن الموضوع تفيدنا وتفيد الناس ونقدر من خلالها نختار الغسول ونعطي النصائح مظبوط
أتمنى أكون قدرت افيدكم
بالتوفيق
لمتابعة الصفحة الرسمية على الفيس بوك
ليست هناك تعليقات:
إرسال تعليق