(اوصف صح) مزيل العرق ومضاد التعرق ومخاطرهم
=======
● لو سمحت يادكتور ممكن مزيل عرق ؟ بس مش عاوز مضاد للتعرق؟
■ ليه بس ايه المشكلة ؟
■ وجبت منين المعلومة دي ؟😠
● زمايلي قالولي وقرأتها على النت
■ الله يخرب بيت النت ياراجل 😂
*** ركز معايا في اللي جاي👇***
بداية كده عرق الإنسان عامل زي الماء كده ملوش ريحة 😳 لكن اللي بيعمل الريحة هي البكتريا اللي موجودة في أماكن العرق مثل تحت الابطين ✔
👌 الفرق بين مزيل العرق ومضاد التعرق
● مزيل العرق deodorant عبارة عن حاجة تقتل البكتريا وتمنع حدوث رائحة العرق.
● مضاد التعرق antiperspirants عبارة عن حاجة تمنع خروج العرق من الجسم + حاجة تقتل البكتريا وتمنع حدوث رائحة العرق.
🔵 محدش اتكلم على مزيلات العرق المشكلة كلها في الكلام على مضادات التعرق اللي بتمنع خروج العرق من الجسم⛔
*** مضادات التعرق 👇👇***
بتعتمد في طريقة عملها في الغالب على أملاح الألومنيوم aluminum salts عن طريق أنها بتتفاعل مع بعض الماء اللي في العرق والرطوبة اللي في الجلد وتكون جل يعمل سدادة plug مؤقتة تمنع خروج العرق من الجسم، والسدادة دي بتكون مؤقتة وبتروح مع الاستحمام 💦💦
*** الخطورة فين؟؟ ⛔👇***
1. بيقولوا الألومنيوم ده بيمتص من الجلد ويوصل للثدي ويعمل سرطان الثدي breast cancer 😳
👊 الكلام ده مش مظبوط لأن الدراسات المحترمة اللي اتعملت على الموضوع ده لقت أن نسبة الألومنيوم في الخلايا السرطانية زي نفس الخلايا اللي حواليها ولم يجدوا أي دليل علمي حقيقي على الكلام ده والدراسات الضعيفة اللي اتعملت وأثبتت هذا الإدعاء تم الرد عليها جميعا كما أن نسبة الألومنيوم اللي بيتم امتصاصها من مزيلات العرق نسبة ضعيفة جدا جدا 0.012% فقط.
2. بيقولوا الألومنيوم ده بيمتص ويعمل زهايمر 😳
👊 على فكرة مش اسمه زهايمر 😂 اسمه الزهايمر بالألف واللام علشان محدش يضحك عليك
ثانيا الكلام ده نظرية قديمة وناس كتير اتكلمت في نقطة أن الألومنيوم ملوش دعوة بالألزهايمر ومزيلات العرق ملهاش دعوة بالألزهايمر.
3. بيقولوا الألومنيوم ده بيمتص ويأثر على مرضى الكلى 😳
👊 النسبة اللي بتمتص زي ماقلنا ضعيفة جدا لاتؤثر وحتى على افتراض جدلا انها أثرت بتأثر على مريض الكلى المرحلة الاخيرة اللي بيعمل غسيل كلى (وده اللي ال FDA طلعت تنبيه عليه وقالت يسأل طبيبه عن النقطة دي) وعمليا المريض محتاج يشرب قزازة مزيل العرق كلها أو يأكل الستيك stick كاملة علشان تأثر على الكلى ومع ذلك لو لقيت مريض بيغسل كلى اديله ياسيدي مزيل عرق aluminum free ولايهمك.
4. بيقولوا مزيل العرق فيه بارابين paraben وده بقى بيعمل سرطان 😳
👊 للأسف برضه الدراسات اللي اتعملت حتى الآن عن تسبب البارابين paraben في حدوث سرطان لم تثبت قطعا وياسيدي لو شاكك عندك الف منتج medicated cosmetic في الصيدلية خالي من البارابين paraben free بس المنظمات المحترمة المسؤولة عن السرطان في العالم قالت لم يثبت أنه بيعمل سرطان.
*** الخلاصة 👌👇***
✔مضادات التعرق زيها زي مزيلات العرق آمنة جدا مفيش منها أي مشاكل وده كلام المنظمات العالمية المحترمة وكل اللي على النت ده إشاعات انتشرت عبر الايميلات من كم سنة ومحدش عارف أصلها
👌لو عاوز تقرأ الموضوع بالتفصيل اقرأ عنه في المنظمات والمواقع المحترمة اللي تحت دي وسيبك من أي مواقع تانية ولو سمحت قبل ماتجادل وتقعد تجيب لينكات وتحذيرات ودراسات اقرأ الموضوع في المواقع دي هتلاقيهم موضحين جميع الدراسات اللي اتعملت بالتفصيل علشان بس مش تضيع وقتك في الجدال☺
بالتوفيق
ولمزيد من المعلومات المفيدة والممتعة يمكنكم متابعة الصفحة الرسمية
ليست هناك تعليقات:
إرسال تعليق