10 حقائق عن القمل

(اوصف صح) 10 حقائق عن القمل

*****

مالك قرفان كده ليه؟😖 بتقول يععع؟؟ بتقول ايه البوست المقرف ده ؟😣 

لا ياحبيبي مش عاوزك تقرف.... وأنا عامل البوست ده مخصوص علشان تعرف الحقيقة وتبطل تقرف وتطمن الناس

👌 خد عندك شوية الحقائق دي علشان هتفيدك وهتفيد الناس كتير جدا 👇:

1. والله العظيم القمل مش بيطير ولا بيعوم ولا بينط من رأس لرأس فلما حد يقول لك القمل طار من الواد على رأس ابني قول له القمل لسه ربنا مخلقش له أجنحة هو لحد دلوقتي بيزحف بس.

القمل بيتنقل عن طريق احتكاك رأس واحد مصاب بواحد سليم أو استخدام أدواته الشخصية اللي بيضعها على رأسه

واحد دماغه جت على دماغ واحد أو لعب في شعر المصاب وبعدين حط أيده في شعره أو لبس الكاب أو الطاقية بتاعته وهكذا.

2. القمل مش بيصيب أشخاص أو جنسيات أو ألوان معينة يعني ده بنجالي ولاهندي ولا اسود ولا ابيض ولا دي خدامة وده باشا ملهاش أي علاقة.

3. القمل ملوش أي علاقة بالنظافة الشخصية 😳

متستغربش الله يكرمك 

حد يقول لك الولد ده مش نظيف ولا المدرسة دي مش نظيفة قول له القمل بيتغذى على الدم مش بيتغذى على القذارة اللي في الرأس وممكن يكون مش بيأخذ باله منها اصلا

ومتخليش حد يقول لك أصله بيعيش تحت الحاجات اللي مش نظيفة علشان القمل مش بيكون سقعان ويتغطى

🔴 طبعا دي مش دعوى لعدم النظافة الشخصية ولكن لأن بسبب النقطة دي بالذات عاملة مشاكل وبنلاقي ناس بتهجر عائلات كاملة ومدارس بدعوى أن دي عائلة مش نظيفة أو مدرسة مش نظيفة.

4. القمل لاينقل أي أمراض 😳

الله يكرمك بطل تستغرب بقى 

فعلا قمل الرأس لاينقل أي أمراض واللي بينقل بعض الأمراض هو قمل الجسم body lice وده نوع تاني خالص فبلاش نرعب الناس ونحسسهم أن اللي جاله قمل ده جاله سرطان.    

5. القمل ملوش علاقة مطلقا بطول الشعر أو لونه

علشان بس محدش يقول لك أصل بنتي شعرها طويل واسود والقمل بيحب ده

لما تسمع كده قول لها حضرتك القمل مش جاي يتجوز بنتك علشان شعرها طويل.

6. بلاش الشخص يحلق الشعر زلبطة معتقد أنه بكده بيشيل القمل 

الحلاقة شكلها مش ظريف خالص على فكرة.

7. بلاش استعمال الجاز والصابون الأسود بتاع المواعين

ممكن نلاقي البيت كله محروق 🔥 وبرضه معالجتش القمل مينفعش كده والله.

8. القمل مش بيسبب تساقط الشعر ولا بيطلع شعر جديد 

علشان مش كل شوية حد يسأل ويقول ايه رأيك يادكتور في القمل الطبي اللي بيعالج تساقط الشعر 😁😁

9. مينفعش الطفل يقعد من المدرسة علشان عنده قمل في رأسه 

كل المنظمات العالمية المحترمة بتقول حرام تضيع مستقبل الطفل وتخليه يغيب كم يوم من المدرسة بسبب شئ بسيط سهل جدا علاجه.

10. نيجي لأهم نقطة 

🔵 يادكتوووور: الشامبو الاحسن ولا البخاخ؟

الإجابة الصارمة القاطعة قولا واحدا البخاخ احسن من الشامبو 

● طبعا مش بقول الشامبو وحش ولكن البخاخ أفضل ونتائجه احسن علشان بتستقر المواد الفعالة في الرأس أكثر 

وكل المنظمات العالمية اللي اتكلمت عن القمل قالت إن البخاخ واللوشن أفضل من الشامبو 

يارب يكون البوست مفيد

ممكن نكون متكلمناش في أدوية كتير بس دي أسئلة بنتسألها تقريبا بشكل يومي 

بالتوفيق 

ولمزيد من المعلومات المفيدة والممتعة يمكنكم تصفح الصفحة الرسمية 

https://facebook.com/Dr-Moamen-Attya-1493741650946059/